Nigerin paytaxtı Niameydə bir qrup gənc hərbçinin qiyam cəhdindən sonra onlarla hərbçinin öldüyü və ya saxlanıldığı bildirilir.
İğtişaşlar təxminən bir sutka davam edib. Toqquşmalar Prezident sarayının yaxınlığında və Niamey beynəlxalq hava limanı ərazisində yerləşən əsas hərbi bazada baş verib. Gecə saatlarında bazada intensiv atışma və partlayış səsləri eşidilib.
Nigerin dövlət televiziyasının məlumatına görə, təhlükəsizlik qüvvələri vəziyyətə nəzarəti bərpa edib və qiyamçıları saxlayıb.
Ölkənin müdafiə naziri Salifu Modi bildirib ki, bir qrup hərbçi hərbi intizamı və nizamnaməni pozaraq bazada bir neçə zabiti girov götürüb, həmçinin “həssas obyektlər”ə atəş açıb.
Analitiklərin və diplomatların sözlərinə görə, qiyamçılar şənbə günü gec saatlara qədər baza ərazisində qalıblar. Prezident qvardiyası dövlət başçısının sarayının təhlükəsizliyini təmin edib və hərbi obyekt üzərində nəzarətin bərpası üçün əraziyə göndərilib.
