İran Prezidenti Məsud Pezeşkian ölkəsinin Azərbaycanla münasibətləri yeni mərhələyə çıxarmaq üçün əlverişli imkanların yarandığını bildirib.
Onun sözlərinə görə, İran hazırda Azərbaycanla yanaşı, Səudiyyə Ərəbistanı, Türkiyə, BƏƏ, Qətər, Oman, Misir və Türkmənistanla əlaqələrin inkişaf etdirilməsi və mühüm sazişlərin imzalanması üçün uyğun şəraitin yarandığını düşünür.
Pezeşkian güc tətbiqinə əsaslanan siyasətin nəticə vermədiyini deyərək, regionda dialoq və mehriban qonşuluq siyasətinə üstünlük verdiklərini vurğulayıb.
İran Prezidenti ABŞ ilə Hörmüz boğazı ətrafındakı gərginliyə də toxunaraq bildirib ki, Vaşinqton dəniz blokadasına son qoysa, sanksiyaları ləğv etsə və İrana məxsus dondurulmuş vəsaitləri sərbəst buraxsa, Tehran boğazı gəmiçilik üçün açmağa hazırdır.
Pezeşkian həmçinin regional sabitliyin təmin olunması üçün İsrailin Livandakı hücumlarını dayandırmasının vacib olduğunu qeyd edib.
