Polşanın Azərbaycandakı fövqəladə və səlahiyyətli səfiri Pavel Radomski Xarici İşlər Nazirliyinə çağırılıb.
Görüş zamanı avqustun 26-da Polşanın ictimai yayım orqanı TVP-nin (TVP World) “Eastern Express” verilişində Azərbaycan əleyhinə yayımlanan süjetlə bağlı kəskin etiraz bildirilib.
Qeyd olunub ki, süjetdə Azərbaycan dövlətinə və ölkə rəhbərliyinə qarşı qərəzli, qeyri-obyektiv və qəbuledilməz iddialar yer alıb. Həmçinin veriliş zamanı aparıcının təxribat xarakterli davranışına etiraz edilib və bununla bağlı Polşa tərəfinə etiraz notası təqdim olunub.
Azərbaycanla Ermənistan arasında normallaşma və sülh prosesi, eləcə də Azərbaycanın regionda davamlı sülh, sabitlik və təhlükəsizliyin təmin edilməsi istiqamətində səylər göstərdiyi bir vaxtda həqiqəti təhrif edən məlumatların yayılmasının Azərbaycan tərəfi üçün suallar doğurduğu diqqətə çatdırılıb.
Polşa hökuməti tərəfindən maliyyələşdirilən ictimai yayım orqanında Azərbaycana qarşı mənfi xarakterli məzmunun yayımlanması ölkələr arasında mövcud tərəfdaşlıq ruhuna zidd və ikitərəfli münasibətlərə ciddi zərər vurmaq potensialına malik qeyri-dost addım kimi qiymətləndirilib.
Polşa tərəfi Azərbaycanı hədəf alan bu cür təxribatçı kampaniyaların dayandırılması istiqamətində təxirəsalınmaz və təsirli tədbirlər görməyə çağırılıb.
