“Farmaniya.com” onlayn piramidasının idarəetmə panelinin admini Hüseyn Quliyevin vaxtından əvvəl azadlığa buraxılacağı ilə bağlı yayılan məlumatlar cinayət işi üzrə zərərçəkənlərin narazılığına səbəb olub.
Zərərçəkənlər “Musavat.com”a müraciət edərək bildiriblər ki, onlar Quliyevin cəzasının ağırlaşdırılmasını tələb etdikləri halda, onun cəzasının yüngülləşdiriləcəyi və vaxtından əvvəl azadlığa buraxılacağı barədə məlumatlar alırlar. Onların sözlərinə görə, yüzlərlə şəxsin zərər çəkdiyi iddia olunan iş üzrə belə bir qərarın verilməsi ciddi narazılıq yarada bilər.
Xatırladaq ki, Hüseyn Quliyev barəsində bu ilin iyununda Bakı Ağır Cinayətlər Məhkəməsində hökm çıxarılıb. Hakim Leyla Əsgərova Məmmədovanın sədrliyi ilə keçirilən məhkəmə tərkibi ona Cinayət Məcəlləsinin 193-1.3.2-ci maddəsi ilə verilmiş ittihama bəraətverici əsaslarla xitam verib.
Məhkəmənin hökmü ilə Hüseyn Quliyev Cinayət Məcəlləsinin 178.2.2-ci maddəsi (dələduzluğun təkrar törədilməsi) və 244-1.2.2-ci maddəsi (qumar oyunlarının virtual formada, internet və ya digər elektron vasitələrdən istifadə edilməklə təşkili və ya keçirilməsi) ilə təqsirli bilinərək 4 il müddətinə azadlıqdan məhrum edilib.
Dövlət ittihamçısı isə məhkəmədə Quliyevin 10 il müddətinə azadlıqdan məhrum edilməsini istəyib.
“Farmaniya.com” işi 2025-ci ilin sentyabrında geniş ictimai rezonans doğurub. İstintaq materiallarına əsasən, sosial şəbəkələrdə “investisiya layihəsi” kimi təqdim olunan platformanın onlayn piramida sxemi ilə fəaliyyət göstərməsi və vətəndaşların vəsaitlərinin mənimsənilməsi ilə bağlı çoxsaylı müraciətlər daxil olub.
Əməliyyat-texniki tədbirlər nəticəsində platformanın idarəetmə panelinin admini, 2006-cı il təvəllüdlü Hüseyn Quliyev saxlanılıb.
İstintaqın məlumatına görə, Quliyev sosial şəbəkələrdə özünü bloger kimi təqdim edərək “Farmaniya.com” saytını rəsmi investisiya layihəsi kimi reklam edib, istifadəçilərə yatırdıqları vəsait müqabilində yüksək gəlir vəd edib.
Araşdırma zamanı 18 mindən çox şəxsin platformada qeydiyyatdan keçdiyi, dələduzluq yolu ilə 400 min manata yaxın vəsaitin mənimsənildiyi müəyyən edilib. Həmçinin vətəndaşların vəsaitlərinin ələ keçirilməsi üçün Badamxanım Əhmədovanın adına açılmış elektron pul kisəsindən istifadə olunduğu müəyyənləşdirilib.
İstintaq zamanı saxlanılan şəxslərin istifadə etdikləri bank kartlarına ümumilikdə 700 min manatdan artıq vəsaitin mədaxil edildiyi də aşkarlanıb.
Hazırda zərərçəkənlərin əsas tələbi məhkəmənin təyin etdiyi 4 illik cəzanın dəyişdirilərək ağırlaşdırılmasıdır. Onlar Quliyevin vaxtından əvvəl azadlığa buraxılacağı barədə yayılan məlumatların isə əlavə suallar yaratdığını bildirirlər.
Qeyd edək ki, Hüseyn Quliyev “Zevs” ləqəbi ilə tanınan videobloger Ruslan Quliyevin qardaşıdır.
