Bakıda daha 10 ünvanda tibb və sosial xidmət müəssisələrinin qarşısında sərnişinlərin minib-düşməsi üçün yerlər və taksilər üçün duracaqlar təşkil olunub.
Azərbaycan Yerüstü Nəqliyyat Agentliyinin (AYNA) məlumatına görə, bu məqsədlə bəzi parklanma yerləri ləğv edilib, ərazilərdə “3.28” – “Durmaq qadağandır” və “5.14” – “Minik taksilərinin duracaq yeri” nişanları, həmçinin xüsusi hərəkət zolaqlarında məlumat lövhələri quraşdırılıb.
Yeni minib-düşmə yerləri və taksi duracaqları aşağıdakı ünvanlarda təşkil olunub:
Cavadxan küçəsi – Akademik Zərifə Əliyeva adına Milli Oftalmologiya Mərkəzinin qarşısı;
İsmayıl bəy Qutqaşınlı küçəsi – 1 saylı Bakı DOST Mərkəzinin yanı;
Heydər Əliyev prospekti – 3 saylı Bakı DOST Mərkəzinin yanı;
Ziya Bünyadov prospekti – 4 saylı Bakı DOST Mərkəzinin qarşısı, avtobus zolağında;
Abbas Mirzə Şərifzadə küçəsi – 3 saylı Bakı “ASAN xidmət” mərkəzinin qarşısı;
9-cu köndələn küçəsi – 5 saylı Bakı “ASAN xidmət” mərkəzinin yanı;
Hüseynbala Əliyev küçəsi – “Memar Əcəmi” metro stansiyasının yaxınlığı;
Süleyman Sani Axundov küçəsi – “Azadlıq Prospekti” metro stansiyasının yaxınlığı;
Füzuli küçəsi – “28 Mall”un yanı;
Şəmsi Bədəlbəyli küçəsi – “28 Mall”un yanı, avtobus zolağında.
Süleyman Sani Axundov küçəsində həm minib-düşmə yeri, həm də taksi duracağı təşkil olunub. Digər ünvanlarda isə əsasən sərnişinlərin minib-düşməsi üçün yerlər yaradılıb.
