Qazaxıstanda yeni birpalatalı parlamentin — Qurultayın deputatlarının seçilməsi üçün keçirilən seçkilərdə səsvermənin başlamasından üç saat sonra seçici fəallığı 17,96% təşkil edib.
Qazaxıstan Mərkəzi Seçki Komissiyasının məlumatına görə, bu barədə MSK üzvü Azamat Aymanakumov açıqlama verib.
Ölkə üzrə 10 mindən çox seçki məntəqəsi yerli vaxtla saat 07:00-da (Bakı vaxtı ilə 06:00) fəaliyyətə başlayıb. Səsvermə saat 20:00-dək (Bakı vaxtı ilə 19:00) davam edəcək.
Hərbi hissələrdə, növbəli iş qəsəbələrində və xüsusi müəssisələrdə yerləşən təxminən 100 seçki məntəqəsi isə səsverməyə bir saat əvvəl başlayıb.
Seçkilərdə 7 siyasi partiya iştirak edir. Partiyaların siyahılarında ümumilikdə 545 namizəd yer alır. Yeni parlamentdə 145 deputat mandatının olması nəzərdə tutulur.
Seçici siyahılarına 12 605 788 nəfər daxil edilib. Səsvermə ölkə üzrə 10 423 seçki məntəqəsində, o cümlədən Qazaxıstanın 61 xarici dövlətdəki nümayəndəliklərində yaradılmış 79 məntəqədə keçirilir.
Seçkiləri akkreditasiyadan keçmiş 777 beynəlxalq müşahidəçi izləyir. Onlardan 160-ı 42 ölkəni, 617-si isə 13 beynəlxalq təşkilatı təmsil edir.
