Rusiyanın Perm şəhərində avqustun 21-də səhər saatlarında partlayış səsləri eşidilib. Partlayışların şəhərdəki neft emalı zavodunun ərazisində baş verdiyi bildirilir.
Yerli sakinlərin sözlərinə görə, zavodun yaxınlığında bir neçə partlayış olub. Monitorinq kanalları mümkün hədəfin “LUKOYL-Permnefteorgsintez” neft emalı zavodu olduğunu yazıb. Zavod Ukrayna sərhədindən 1 500 kilometrdən çox məsafədə yerləşir.
Perm hakimiyyət orqanları pilotsuz uçuş aparatlarının hücumunu təsdiqləyib. Bildirilib ki, hava hücumundan müdafiə qüvvələri hücumu dəf etməyə çalışır. Permdəki “Böyük Savino” hava limanında isə təyyarələrin qəbulu və yola salınması müvəqqəti dayandırılıb.
Hadisə zamanı zavoda dəymiş ziyanın miqyası və istehsal prosesinə təsir barədə rəsmi məlumat açıqlanmayıb.
Qeyd edək ki, “LUKOYL-Permnefteorgsintez” Rusiyanın iri neft emalı müəssisələrindən biridir. Zavodun illik emal gücü təxminən 13 milyon ton neft təşkil edir.
