Daxili İşlər Nazirliyi vətəndaşlara “WhatsApp” və sosial şəbəkələrdə kiberdələduzluq halları ilə bağlı xəbərdarlıq edib.
Nazirlikdən bildirilib ki, son günlər vətəndaşların adına oxşar saxta hesablar yaradılaraq onların yaxınları və tanışları ilə əlaqə saxlanılır, müxtəlif bəhanələrlə pul vəsaiti tələb olunur.
Kiberdələduzlar tanınan şəxslərin adından, fotoşəkillərindən və digər məlumatlarından istifadə edərək saxta profillər yaradır və yaxınlarına təcili pul göndərilməsi barədə mesajlar yazırlar.
DİN vətəndaşları bu cür mesajlara qarşı diqqətli olmağa çağırıb. Tanış şəxsin adından pul istənilməsi barədə mesaj daxil olduqda, ilk növbədə həmin şəxslə başqa vasitə ilə əlaqə saxlayaraq məlumatın doğruluğunu yoxlamaq tövsiyə olunur.
Nazirlik qeyd edib ki, profil fotosunun və adının tanış olması hesabın məhz həmin şəxsə məxsus olduğunu təsdiqləmir.
Şübhəli hesab və mesajlarla qarşılaşan şəxslərə pul göndərməmək, şəxsi və bank məlumatlarını paylaşmamaq, şübhəli keçidlərə daxil olmamaq tövsiyə edilir.
Kiberdələduzluqla qarşılaşdıqda DİN-in “102” Xidməti-Zəng Mərkəzinə və ya Nazirliyin rəsmi sosial şəbəkə hesablarına müraciət etmək mümkündür.
