Avqustun 11-də Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı İlham Əliyev və birinci xanım Mehriban Əliyeva Naxçıvanda Əlahiddə Ümumqoşun Orduda yeni yaradılan əməliyyat (komando) hərbi hissələrinə Döyüş bayraqlarının verilməsi mərasimində iştirak ediblər.
Əlahiddə Ümumqoşun Ordu Qərargahında Prezident İlham Əliyev və birinci xanım Mehriban Əliyevanı Müdafiə Nazirliyinin rəhbər heyəti qarşılayıb.
Müdafiə naziri, general-polkovnik Zakir Həsənov yeni yaradılan hərbi hissələr barədə Ali Baş Komandana məruzə edib.
Mərasim zamanı komando hərbi hissələrinin komandirləri Döyüş bayraqlarını qəbul edərək sıraya düzüblər.
Daha sonra Prezident İlham Əliyev və birinci xanım Mehriban Əliyeva hərbi hissələrin şəxsi heyəti ilə xatirə fotosu çəkdiriblər.
Sonda dövlət başçısına ordunun arsenalında olan silah sistemləri və hərbi-texniki vasitələr barədə məlumat verilib.
