Azərbaycanın İnterpol xətti ilə beynəlxalq axtarışa verdiyi şəxs Monteneqroda saxlanılaraq ölkəyə ekstradisiya olunub.
Ədliyyə Nazirliyinin məlumatına görə, Azərbaycan vətəndaşı Hidayət Nemət oğlu Süleymanov 2024-cü ildə dələduzluq etməkdə ittiham olunaraq axtarışa verilib.
Bildirilib ki, o, Cinayət Məcəlləsinin 178.2.4-cü maddəsi ilə – tamah niyyəti ilə etibardan sui-istifadə və aldatma yolu ilə zərərçəkmişə xeyli miqdarda ziyan vurmaqda təqsirləndirilir.
Baş Prokurorluğun sorğusu və aparılan danışıqlardan sonra H.Süleymanovun Azərbaycana ekstradisiyası ilə bağlı razılıq əldə olunub.
O, Ədliyyə Nazirliyinin Beynəlxalq əməkdaşlıq baş idarəsinin və Penitensiar xidmətin əməkdaşları tərəfindən Monteneqronun Tivat şəhərindən Azərbaycana gətirilib və məhkəmənin həbs qərarı əsasında istintaq təcridxanasına yerləşdirilib.
