Ermənistanın Baş Prokurorluğu baş nazir Nikol Paşinyanın həyat yoldaşı Anna Akopyanın sosial şəbəkələrdə aldığı təhdidlərlə bağlı müraciəti əsasında icraata başlayıb.
Ermənistan KİV-in məlumatına görə, Anna Akopyan ailədaxili zorakılıq mövzusunda ictimai müzakirələrdən sonra ona qarşı sosial şəbəkələr vasitəsilə təhdidlərin artdığını bildirib. O, bu səbəbdən təhlükəsizliyi ilə bağlı narahatlıq keçirdiyini və dövlət qurumlarının onu qoruya biləcəyinə ümid etdiyini deyib.
Akopyan eyni zamanda qadınları psixoloji, fiziki və cinsi zorakılıq halları barədə açıq danışmağa çağıraraq, bu problemin siyasi baxışdan, təhsil səviyyəsindən və sosial statusdan asılı olmayaraq bütün qadınlara aid olduğunu vurğulayıb.
Ermənistanın Baş Prokurorluğu müraciət əsasında araşdırmaya başlanıldığını təsdiqləyib, lakin istintaqın detalları barədə əlavə məlumat açıqlamayıb.
