Akkreditasiya Şurasının növbəti iclasında 7 ali təhsil müəssisəsi üzrə institusional, 16 ali təhsil müəssisəsində isə “İbtidai sinif müəllimliyi” və “Məktəbəqədər təhsil” ixtisasları üzrə proqram akkreditasiyasının nəticələri müzakirə olunub.
Elm və Təhsil Nazirliyinin məlumatına görə, Naxçıvan Dövlət Universiteti, Bakı Ali Neft Məktəbi, Azərbaycan Dövlət Aqrar Universiteti və Mingəçevir Dövlət Universiteti növbəti 5 il, Sumqayıt Dövlət Universiteti və Gəncə Dövlət Universiteti isə növbəti 3 il müddətinə institusional akkreditasiya olunub.
Bakı Qızlar Universiteti üzrə institusional akkreditasiya qiymətləndirilməsinin yekun nəticəsi isə “uyğun deyil” hesab edilib və qanunvericiliyə uyğun tədbirlərin görülməsi barədə qərar qəbul olunub.
Proqram akkreditasiyası üzrə “İbtidai sinif müəllimliyi” ixtisasında 6 proqram 5 il, 3 proqram 3 il müddətinə akkreditasiya olunub. Daha 4 proqram üzrə çatışmazlıqların aradan qaldırılması üçün 2 ildən sonra təkrar akkreditasiya aparılacaq. Bakı Qızlar Universitetinin bu proqramı akkreditasiyadan keçməyib.
“Məktəbəqədər təhsil” ixtisası üzrə isə 10 proqram 5 il müddətinə akkreditasiya olunub, 3 proqram üzrə 2 ildən sonra təkrar akkreditasiya keçiriləcək. Bakı Qızlar Universitetinin bu proqramı da “uyğun deyil” nəticəsi alıb.
