FIFA 2026-cı il dünya çempionatının oyunlarında şübhəli mərc fəaliyyəti və ya danışılmış oyun əlamətlərinin aşkarlanmadığını açıqlayıb.
Bu barədə “SbcNews” məlumat yayıb.
Bildirilib ki, FIFA-nın Yarışların Dürüstlüyünün Təmin Olunması üzrə Hədəf Qrupu turnir çərçivəsində keçirilən bütün 104 qarşılaşmanı təhlil edib və heç bir şübhəli mərc fəaliyyəti qeydə almayıb.
Məlumata görə, mütəxəssislər oyunlar zamanı bukmeker bazarlarını və meydanda baş verənləri real vaxt rejimində izləyiblər. Toplanmış məlumatların təhlili nəticəsində heç bir matçda nəticələrin manipulyasiya edilməsinə dair şübhə yaranmayıb.
Hədəf qrupunun tərkibinə futbol konfederasiyalarının, ABŞ, Kanada və Meksika futbol federasiyalarının, eləcə də ABŞ Federal Təhqiqat Bürosu (FTB), İnterpol, BMT-nin Narkotiklər və Cinayətkarlıq üzrə İdarəsi, Avropa Şurası, “Sportradar”, Beynəlxalq Mərc Dürüstlüyü Assosiasiyası və digər qurumların nümayəndələri daxil olub.
