ABŞ-nin müdafiə naziri Pit Heqset Senatdakı dinləmələr zamanı keçmiş prezident Co Bayden administrasiyasını Ukraynaya silah tədarükü siyasətinə görə tənqid edib.
BBC-nin məlumatına görə, Heqset bildirib ki, Bayden administrasiyası Ukraynaya silahları ABŞ ordusunun hesabına ötürüb, eyni zamanda ordunun maliyyələşdirilməsini lazımi səviyyədə təmin etməyib və vacib texniki xidmət işlərini təxirə salıb.
Nazirin sözlərinə görə, əvvəlki administrasiya büdcə idarəçiliyində ciddi problemlər yaradıb və hərbçilərin ölkənin təhlükəsizliyini təmin etməsi üçün əlavə maliyyəyə ehtiyac var.
O qeyd edib ki, əlavə maliyyələşdirmə olmadığı təqdirdə mövcud və gələcək hərbi təlimlərin həcmi azaldılmalı olacaq. Heqset bildirib ki, yeni maliyyə paketi təsdiqlənərsə, ABŞ ordusunun üstünlüyünün qorunmasına və digər ölkələrlə rəqabət qabiliyyətinin saxlanmasına xidmət edəcək.
Pit Heqset xatırladıb ki, ABŞ-nin Ukraynaya ümumi yardımının həcmi təxminən 300 milyard dollara çatıb.
