Ermənistanın Gümrü şəhərində yerləşən Qara qalanın qanunsuz özgəninkiləşdirilməsi faktı ilə bağlı başlanmış cinayət işi üzrə ibtidai istintaq yekunlaşıb.
Məlumata görə, istintaq zamanı müəyyən edilib ki, Ermənistanın sabiq prezidenti Serj Sarqsyan 2005-ci il mayın 11-də müdafiə naziri vəzifəsində çalışarkən respublika əhəmiyyətli tarixi-mədəniyyət abidəsi olan 626,45 kvadratmetr sahəyə malik Qara qalanı və onun istifadəsi üçün ayrılmış 0,7 hektar torpaq sahəsini birbaşa satış müqaviləsi əsasında fiziki şəxsə 22 milyon 951 min 500 drama (təxminən 107 min manat) satıb.
Bildirilir ki, sözügedən hərəkətlər nəticəsində dövlətin qanuni maraqlarına ciddi ziyan dəyib və bu, ehtiyatsızlıqdan ağır nəticələrə səbəb olub.
İbtidai istintaq dövründə prokurorun qərarı ilə Serj Sarqsyan barəsində Ermənistan Cinayət Məcəlləsinin 441.2.5-ci maddəsi ilə cinayət təqibi başlanıb.
