Azərbaycanda akkreditə olunmuş xarici diplomatik korpus nümayəndələrinin Qarabağ və Şərqi Zəngəzura səfərinin ikinci günü başlayıb.
Səfərdə 58 ölkə və 9 beynəlxalq təşkilatı təmsil edən 150 nəfər iştirak edir. Diplomatik nümayəndə heyətini Prezidentin köməkçisi Hikmət Hacıyev müşayiət edir.
Səfər çərçivəsində diplomatlar Ağdərə və Kəlbəcərdə həyata keçirilən bərpa və quruculuq layihələri ilə tanış olacaqlar.
Onlara regionda reallaşdırılan sosial və iqtisadi infrastruktur layihələri, tarixi-mədəni irs obyektlərinin vəziyyəti, həmçinin onların qorunması və bərpası istiqamətində görülən işlər təqdim ediləcək.
Qeyd edək ki, bu, diplomatik korpus nümayəndələrinin 2020-ci ildən bəri Azərbaycanın işğaldan azad edilmiş ərazilərinə 22-ci səfəridir.
