Ukraynanın Odessa sahilləri yaxınlığında Türkiyəyə məxsus mülki ticarət gəmisi dron hücumuna məruz qalıb. Gəmidə olan 11 Azərbaycan vətəndaşı təxliyə edilib.
Azərbaycan Xarici İşlər Nazirliyinin məlumatına görə, hadisə yerli vaxtla saat 15:15 radələrində Türkiyənin “Okean Maritime“ şirkətinə məxsus “Atlas Bey” adlı ticarət gəmisində baş verib.
Bildirilib ki, ekipaj üzvlərindən 11-i Azərbaycan vətəndaşıdır. Gəmi kapitanı istisna olmaqla, digər ekipaj üzvləri Odessa şəhərində sahilə çıxarılıb və onların vəziyyəti qənaətbəxş qiymətləndirilir.
Hazırda gəmi kapitanının axtarışı davam etdirilir. Azərbaycanın Ukraynadakı səfirliyi aidiyyəti qurumlarla əlaqə saxlayır və vətəndaşlara zəruri konsulluq dəstəyi göstərir.
