Ukrayna Prezidenti Volodimir Zelenski Rusiya ilə müharibənin diplomatik yolla başa çatdırılması üçün imkanlar pəncərəsinin 2027-ci ilin yayının sonuna qədər davam edəcəyini bildirib.
Zelenskinin sözlərinə görə, bu dövr ABŞ-də keçiriləcək G20 sammitindən başlayaraq 2027-ci ilin yayının sonunadək davam edəcək. O, bundan sonra ABŞ-də prezident seçkiləri ilə bağlı kampaniyanın başlayacağını qeyd edib.
Ukrayna Prezidenti hazırkı dövrü diplomatiyanın müharibənin başa çatmasına gətirib çıxara biləcəyi ən aktiv mərhələ kimi qiymətləndirib.
Zelenski bildirib ki, bu məsələni Avropa İttifaqı liderləri ilə də müzakirə edəcək.
Onun sözlərinə görə, ABŞ Prezidentinin xüsusi nümayəndələri Stiv Uitkoff və Cared Kuşner müharibənin başa çatdırılması və Rusiya ilə danışıqlar üçün uyğun formatın müəyyənləşdirilməsi istiqamətində fəal çalışırlar. ABŞ nümayəndələrinin Ukrayna ilə diplomatik səyləri daha əvvəl də müzakirə olunub.
