Ukrayna Prezidenti Volodimir Zelenski bildirib ki, Kiyev Rusiya-Ukrayna müharibəsinin 2026-cı ilin qışına qədər başa çatması üçün əlindən gələni edəcək.
Zelenski Ukrayna səfirləri ilə Kiyevdə keçirilən müşavirədə çıxışı zamanı qeyd edib ki, Ukrayna diplomatiyasının əsas məqsədi hökumətin xarici siyasət kursunu dəstəkləmək və beynəlxalq tərəfdaşlarla əməkdaşlığı daha da gücləndirməkdir.
O vurğulayıb ki, Rusiyaya qarşı tətbiq olunan sanksiyaların və beynəlxalq məhdudlaşdırıcı tədbirlərin nə vaxt tam nəticə verəcəyini dəqiq proqnozlaşdırmaq mümkün deyil. Bununla belə, təzyiq elə səviyyəyə çatmalıdır ki, Moskvanın sülhdən başqa alternativi qalmasın.
Ukrayna lideri əlavə edib ki, Kiyev müharibənin artıq bu payız, qışa qədər başa çatması üçün maksimum səy göstərəcək. Onun sözlərinə görə, Ukrayna Rusiyanın münaqişəni uzatmaq, yeni səfərbərlik keçirmək və yeni hücumlar hazırlamaq niyyətində olduğunu da nəzərə alır.
