“Azərişıq” ASC Qarabağ və Şərqi Zəngəzurda elektrik şəbəkələrinin yenidən qurulması və əsaslı təmiri işlərini davam etdirir.
Xəbər Mərkəzi bildirir ki, Xocalı və Xocavənd rayonlarının bir sıra kənd və qəsəbələrində elektrik təsərrüfatının yenilənməsi həyata keçirilir.
Ümumilikdə Xocalı və Xocavəndin 30-a yaxın kəndində daxili və xarici elektrik şəbəkələri yenilənir. Bu yaşayış məntəqələrində müxtəlif gücdə 100-ə yaxın 35/0,4 kV-luq Komplekt Transformator Məntəqəsi (KTM) quraşdırılıb. Həmçinin 0,4 və 35 kV-luq metal dayaqlar basdırılır, izolyasiyalı elektrik xətləri çəkilir.
Xocalı şəhərində 10 müasir tipli müxtəlif gücdə KTM quraşdırılıb. Rayonun Badara, Ballıca, Daşbulaq, Təzəbinə, Seyidbəyli və Xanyurdu kəndlərində yenidənqurma işləri başa çatıb. Şuşakənd və Xanobad kəndlərində isə 35 kV-luq Özünüdaşıyan İzolyasiyalı Naqillərin (ÖİN-3) çəkilişi davam edir.
Xocavənd rayonunun Hadrut və Qırmızı Bazar qəsəbələri, eləcə də Sos kəndinə köçürülən ailələr dayanıqlı və keyfiyyətli elektrik enerjisi ilə təmin olunub. Bu ərazilərdə elektrik şəbəkələri yenidən qurulub, 10 və 35 kV-luq hava xətlərində və güc transformatorlarında təmir-bərpa işləri aparılıb, smart sayğaclar quraşdırılıb.
Hazırda Xocavənd şəhəri ilə yanaşı, Çörəkli, Güneyxırman, Qarakənd, Quzeyxırman və Xanoba kəndlərində də təmir-bərpa və yenidənqurma işləri davam etdirilir.
