Azərbaycan Xarici İşlər Nazirliyi (XİN) vətəndaşları hərbi əməliyyatların getdiyi və təhlükəsizlik vəziyyətinin qeyri-sabit olduğu bölgələrə səfər etməkdən çəkinməyə çağırıb.
Bu barədə XİN-in Mətbuat xidməti idarəsinin rəisi Ayxan Hacızadə Qara dənizdə Bolqarıstan sahili yaxınlığında Azərbaycan vətəndaşlarının olduğu gəminin hücuma məruz qalması ilə bağlı sualı cavablandırarkən bildirib.
“Bir daha Azərbaycan vətəndaşlarını hərbi əməliyyatların getdiyi və təhlükəsizlik vəziyyətinin qeyri-sabit olduğu bölgələrə səfər etməkdən, bu ərazilərdə, habelə riskli marşrutlar üzrə hərəkət edən nəqliyyat vasitələrində, xüsusilə Qara dəniz və Azov dənizi akvatoriyalarında gəmilərdə əmək fəaliyyəti ilə məşğul olmaqdan çəkinməyə çağırırıq”, – deyə məlumatda bildirilib.
Qeyd edək ki, Qara dənizdə Bolqarıstan sahili yaxınlığında göyərtəsində Azərbaycan vətəndaşlarının da olduğu “CHELSEA-3” adlı xarici yük gəmisi hücuma məruz qalıb. Gəminin 15 nəfərlik heyətində olan 8 Azərbaycan vətəndaşının hamısı xilas edilib.
