DİN-in Kibercinayətkarlıqla Mübarizə Baş İdarəsinin Gürcüstanın hüquq-mühafizə orqanları ilə birgə keçirdiyi əməliyyat nəticəsində xaricdən idarə olunan qanunsuz onlayn qumar şəbəkəsinin rəhbəri saxlanılaraq Azərbaycana gətirilib.
Araşdırmalar zamanı müəyyən edilib ki, axtarışda olan Anar Əliyev (“Anar007”) mütəşəkkil dəstə yaradaraq xarici ölkələrdə qanunsuz mərc və kazino oyunları təşkil edib. O, Azərbaycan vətəndaşlarından ibarət şəxsləri dəstəyə cəlb edərək onları Tbilisi və digər şəhərlərdə kirayələdiyi evlərdə yerləşdirib.
Əməliyyat tədbirləri çərçivəsində dəstənin digər üzvləri Əşrəf Həsənzadə, Seymur Nurullayev, Etibar Sultanov, Rəşad Rzazadə, Şərqin Əliyev və Anar Surac oğlu Əliyev də saxlanılıb.
İstintaqla onların qanunsuz kazino fəaliyyəti üçün mobil nömrələr, bank kartları və texniki avadanlıqlarla təminat həyata keçirdikləri, qumar oyunlarından əldə olunan vəsaitləri nağdlaşdıraraq kriptovalyuta formasında Anar Əliyevə məxsus hesablara köçürdükləri müəyyən edilib.
Qanunsuz əldə olunan vəsaitlərin bir hissəsinin daşınar və daşınmaz əmlakların alınması yolu ilə leqallaşdırıldığı da istintaq zamanı müəyyənləşdirilib.
Saxlanılan şəxslərdən çoxsaylı elektron daşıyıcılar, bank kartları və digər əşyalar maddi sübut kimi götürülüb. Onlara ittiham elan edilərək cinayət məsuliyyətinə cəlb olunublar. Məhkəmənin qərarı ilə Anar Əliyev və Şərqin Əliyev barəsində həbs qətimkan tədbiri seçilib.
Digər şəxslərlə bağlı əməliyyat-istintaq tədbirləri davam etdirilir.
