Ukraynadan Azərbaycana idxal olunan kərə tərkibli spred yağı məhsulunda uyğunsuzluq aşkarlanıb.
Azərbaycan Qida Təhlükəsizliyi Agentliyinin (AQTA) məlumatına görə, “Qədiroğlu” MMC tərəfindən idxal edilən, Ukraynanın “Ratnovskiy molokozavod” MMC-də istehsal olunan “Lyuks Golden Ratne 81,5%, 5 kq” əmtəə nişanlı məhsuldan nümunələr götürülərək laborator müayinələr aparılıb.
25 avqust 2026-cı il istehsal və 25 avqust 2027-ci il son istifadə tarixli məhsul partiyasında laborator müayinələr zamanı uyğunsuzluq müəyyən edilib.
Bununla əlaqədar məhsul partiyasının dövriyyəsinin dayandırılması və geri çağırılması barədə qərar qəbul olunub. Həmçinin istehsalçı müəssisədən ixracın müvəqqəti məhdudlaşdırılması və sertifikatlaşdırmanın dayandırılması ilə bağlı Ukraynanın müvafiq qurumuna bildiriş göndərilib.
Qeyd edək ki, bundan əvvəl Ukraynadan idxal olunan “Renet” müəssisəsinin istehsalı olan yağ məhsulunda da uyğunsuzluq aşkarlanıb. Həmin məhsulda 3-monoxlorpropan-1,2-diol (3-MCPD) maddəsi müəyyən edildiyindən Ukraynanın Ərzaq Təhlükəsizliyi və İstehlakçıların Müdafiəsi üzrə Dövlət Xidmətinə ixracın dayandırılması ilə bağlı müvəqqəti məhdudlaşdırıcı tədbirlərin tətbiqi üçün müraciət ünvanlanıb.
