Türkiyədən Azərbaycana gətirilən 10 059 ədəd bioloji aktiv qida məhsulu tərkibindəki maddələrin miqdarı normadan aşağı olduğu üçün məhv edilib.
Azərbaycan Respublikasının Qida Təhlükəsizliyi Agentliyindən (AQTA) verilən məlumata görə, idxal olunan iki adda məhsul laborator müayinələrindən keçirilib.
Müayinələr zamanı “Baku Pharm” MMC-nin Türkiyədən idxal etdiyi, “Honor İlaç Sanayi Ve Ticaret Ltd Şti” müəssisəsində istehsal olunan 5 059 ədəd “Nosetin” əmtəə nişanlı məhsulun tərkibində L-karnitin (L-carnitine) və sitikolin (Citicoline) maddələrinin miqdarının normadan aşağı olduğu müəyyən edilib.
Bundan başqa, “EN Life Group” MMC-nin idxal etdiyi, “Aspar İlaç Kozmetik Gida Sanayi A.Ş.” müəssisəsində istehsal olunan 5 000 ədəd “Magintens” əmtəə nişanlı məhsulda B2 vitamininin və maqnezium bisqlisinat ilə maqnezium sitratın miqdarının normadan aşağı olduğu aşkarlanıb.
Qanunvericiliyin tələblərinə uyğun olaraq hər iki məhsul partiyasının dövriyyəyə buraxılmasının qarşısı alınıb və məhsullar məhv edilib.
