ABŞ Prezidenti Donald Tramp ABŞ ilə Venesuela arasında ölkənin təsdiqlənmiş neft ehtiyatlarının 65 milyard bareldən çox hissəsinə ABŞ-nin nəzarətini nəzərdə tutan razılaşmanın əldə olunduğunu açıqlayıb. Reuters-in məlumatına görə, Tramp razılaşmanın ABŞ-a Venesuelanın nəhəng neft ehtiyatları üzərində əsas nəzarəti verəcəyini bildirib.
Tramp “Truth Social” platformasında razılaşmanı “dünya tarixində ən böyük neft sövdələşməsi” adlandırıb. Onun sözlərinə görə, saziş ABŞ dövlət katibi Marko Rubio və müdafiə naziri Pit Heqsetin Venesuelanın müvəqqəti prezidenti Delsi Rodriges və biznes nümayəndələri ilə danışıqları nəticəsində əldə olunub.
ABŞ lideri bildirib ki, razılaşmanın həyata keçirilməsi Amerika vergi ödəyicilərinə əlavə xərc yaratmayacaq.
Trampın sözlərinə görə, saziş ABŞ-nin neft ehtiyatlarını iki dəfədən çox artırmağa və ölkədə benzinin qiymətini əhəmiyyətli dərəcədə aşağı salmağa imkan verə bilər.
Venesuela tərəfinin açıqlamasına əsasən, razılaşma 17 neft yatağının işlənməsini nəzərdə tutur. Layihəyə təxminən 100 milyard dollar həcmində özəl investisiyanın cəlb olunacağı və Venesuela büdcəsinə 209 milyard dollardan çox vergi gəliri gətirə biləcəyi gözlənilir.
