Azərbaycanda toyuq filesinin qiyməti son həftələrdə artıb. Bəzi satış məntəqələrində 1 kiloqram toyuq filesi 9-10 manata satılır.
Alıcıların sözlərinə görə, bəzi satış məntəqələrində məhsulun qiyməti 4,80 manatdan 7,90 manata, digər yerlərdə isə 6,50-7 manatdan 9 manata yüksəlib.
Satıcılar son günlər bazarda toyuq filesi qıtlığının yarandığını bildirirlər. Məhsulun azalmasının qiymət artımına təsir etdiyi qeyd olunur.
Quş əti, yumurta istehsalçıları və ixracatçıları assosiasiyasının sədri Mürvət Həsənlinin sözlərinə görə, artan tələbat qısa müddətli qıtlıq yaradıb. Sentyabr ayında turist axınının və əhalinin tətildən qayıtmasının tələbatı artırdığı bildirilir.
Assosiasiya sədrinin sözlərinə görə, istehsalçı fabriklərdən toyuq filesinin çıxış qiyməti ötən ilin eyni dövrü ilə müqayisədə dəyişməyib.
