Böyük Britaniya hökuməti Hərbi Dəniz Qüvvələrinə məxsus pilotsuz suüstü aparatlarda quraşdırılan kameraların Çində yerləşən IP ünvanına texniki məlumatlar göndərdiyini müəyyən edib.
“The Telegraph”ın məlumatına görə, söhbət Böyük Britaniyanın aparıcı müdafiə podratçılarından olan “Kraken Technology Group” tərəfindən tədarük edilən “K3 Scout” pilotsuz aparatlarından gedir.
Məlumata əsasən, cihazlarda Çin istehsalı komponentlər aşkarlanıb. Yoxlama zamanı kameraların Çinə sistemin vəziyyəti barədə texniki siqnallar, o cümlədən avadanlığın şəbəkəyə qoşulmasını və işlək vəziyyətdə olduğunu təsdiqləyən məlumatlar göndərdiyi müəyyən edilib.
Məlumat ötürülməsi aşkarlandıqdan sonra Böyük Britaniyanın Müdafiə Nazirliyi cihazları internetdən ayırıb. Nazirliyin sözçüsü bildirib ki, araşdırma zamanı xaricə həssas və ya kritik məlumatların sızdırıldığına dair hər hansı sübut aşkarlanmayıb.
“K3” dronlarının Hörmüz boğazında gəmiçiliyin hərəkət azadlığını təmin etmək məqsədilə Böyük Britaniyanın gələcək tədbirlər paketində istifadə olunması planlaşdırılır.
Nəşr həmçinin kəşfiyyat dronlarının xüsusi təyinatlıların yüksəkvəzifəli nümayəndələrinin mühüm müşavirələr keçirdiyi ərazilərin yaxınlığında istifadəsi və aparatların söndürülməsindən sonra belə kameraların işləməyə davam etməsi ilə bağlı narahatlıqları qeyd edib.
“K3” kəşfiyyat pilotsuz aparatlarından mart ayından etibarən Sahil Qüvvələri Eskadrilyası və Kral Dəniz Piyadalarının 47-ci komando dəstəsi istifadə edir.
