Türkiyənin İstanbul şəhərinin Ümraniyə rayonunda “Süleymançılar” kimi tanınan dini icmanın mərkəzi olduğu bildirilən ünvanda polis tərəfindən axtarış keçirilib.
Türkiyə mediasının məlumatına görə, axtarış zamanı çox sayda icma üzvü binanın qarşısında toplaşıb. Polis əməkdaşları ilə toplaşan şəxslər arasında qarşıdurma yaşanıb və əraziyə əlavə polis qüvvələri cəlb olunub. Axtarışların davam etdiyi bildirilir.
Sosial şəbəkələrdə yayılan görüntülərdə icma nümayəndələrindən birinin toplaşan şəxsləri sakitliyə çağırdığı görünür. O, “Biz bizə yaraşanı edək, onlar da özlərinə yaraşanı etsin” ifadəsini işlədərək kütlənin təmkinli olmasını istəyib.
Qeyd edək ki, əməliyyat Ankara Baş Prokurorluğunun “Süleymançılar” kimi tanınan icma ilə bağlı başlatdığı istintaq çərçivəsində həyata keçirilir. Avqustun 13-də Ankara mərkəzli olmaqla Türkiyənin 17 vilayətində əməliyyat keçirilib. İstintaq çərçivəsində icmanın lideri kimi təqdim olunan Alihan Kuriş də daxil olmaqla 49 şübhəli barəsində saxlanılma qərarı verilib.
İstintaqın əsas istiqamətləri maliyyə hərəkətləri, şirkətlər üzərindən həyata keçirildiyi iddia olunan maliyyə pozuntuları və mütəşəkkil cinayət fəaliyyəti ilə bağlı iddialardır. Araşdırma çərçivəsində çoxsaylı ünvan və şirkətlərdə axtarış və müsadirə tədbirləri həyata keçirilib.
Xatırladaq ki, “Süleymançılar” Türkiyədə Süleyman Hilmi Tunahanın adı ilə bağlı olan və əsasən dini təhsil, Quran kursları və tələbə yataqxanaları vasitəsilə fəaliyyət göstərən dini icma kimi tanınır. Hazırda icmanın rəhbəri kimi Alihan Kurişin adı çəkilir. Bu icmaya qarşı avqustun 13-də başladılan istintaq isə onun rəhbərlik etdiyi iddia olunan strukturun maliyyə fəaliyyəti və digər hüquqi pozuntularla bağlı araşdırılması məqsədi daşıyır.
