Serbiyanın hakim Serb Tərəqqi Partiyası (SNS) ölkə prezidenti Aleksandar Vuçiçin anası Ancelina Vuçiçə qarşı fiziki və şifahi hücum edildiyini bildirib.
Partiyanın rəsmi saytında yayılan bəyanata görə, hadisə oktyabrın 25-də Belqradda, Kaleniç bazarının yaxınlığında baş verib.
SNS-in iddiasına əsasən, blokada tərəfdarı siyasi mövqeyə malik bir qrup gənc Ancelina Vuçiçi itələyib, onun üzərinə qışqırıb və bazardan aldığı ərzaq məhsulları olan torbaları cırıb.
Partiya hadisəni aqressiya, alçaltma və hədə-qorxu aktı kimi qiymətləndirib. SNS səlahiyyətli orqanlardan insidentin bütün hallarının araşdırılmasını və hadisədə iştirak edən şəxslərin məsuliyyətə cəlb olunmasını tələb edib.
Bəyanatda qeyd olunub ki, Ancelina Vuçiç hadisə ilə bağlı polisə müraciət edib. Partiya hüquq-mühafizə orqanlarını insidentə gecikmədən, peşəkar şəkildə və qanunvericiliyə uyğun reaksiya verməyə çağırıb.
SNS, həmçinin bütün siyasi qüvvələrdən hadisəni açıq şəkildə pisləməyi istəyib və siyasi fikir ayrılıqlarının zorakılığa bəraət qazandıra bilməyəcəyini vurğulayıb.
