İran Silahlı Qüvvələri ABŞ Prezidenti Donald Trampa məxsus Birləşmiş Ərəb Əmirlikləri (BƏƏ) və Səudiyyə Ərəbistanındakı daşınmaz əmlak obyektlərini hərbi hədəf hesab etdiyini açıqlayıb.
Bununla bağlı İslam İnqilabı Keşikçiləri Korpusunun (SEPAH) “Telegram” kanalında paylaşım edilib.
Bəyanatda Dubaydakı “Trump International Hotel & Tower”, Ciddədəki “Trump Plaza” və Ər-Riyaddakı “Trump Tower” binalarının adları xüsusi qeyd olunub.
Qeyd edək ki, iyulun əvvəlindən ABŞ və İran arasında gərginlik yenidən artıb, tərəflər arasında sülh danışıqları isə faktiki olaraq dayanıb. Bu müddətdə Ağ Evə Donald Trampa qarşı mümkün sui-qəsd planları ilə bağlı bir neçə kəşfiyyat məlumatının daxil olduğu bildirilir.
İddialardan birinə görə, İranın NATO sammiti zamanı Trampa sui-qəsd hazırladığı ehtimal olunurdu. Donald Tramp bu məlumatı təkzib etsə də, özünə qarşı belə bir hücum olacağı təqdirdə İrana zərbə endirilməsi barədə əvvəlcədən göstəriş verdiyini bəyan etmişdi.
