Səudiyyə Ərəbistanının Abha və Ər-Riyaddakı Kral Xalid adına beynəlxalq hava limanlarına son iki gündə endirilən zərbələr nəticəsində 3 nəfər ölüb, 36 nəfər yaralanıb.
“Associated Press” və “Anadolu” agentliyinin məlumatına görə, hücumlara görə məsuliyyəti Yəməndə fəaliyyət göstərən husilər qruplaşması öz üzərinə götürüb.
Səudiyyə Ərəbistanının Mülki Aviasiya Baş İdarəsinin məlumatına əsasən, Abha Beynəlxalq Hava Limanına hücum zamanı Mərakeş və Əlcəzair vətəndaşı olan iki qadın həlak olub, 28 nəfər yaralanıb. Ər-Riyaddakı Kral Xalid Beynəlxalq Hava Limanına hücum nəticəsində isə Sudan vətəndaşı ölüb, 8 nəfər xəsarət alıb.
Xəsarət alanlar arasında Səudiyyə Ərəbistanı, Banqladeş, Filippin, Pakistan və Misir vətəndaşları var. Onların hamısı xəstəxanaya yerləşdirilib.
Hücumlar nəticəsində hava limanlarına maddi ziyan dəyib. Hazırda zərərin miqyası qiymətləndirilir, sərnişinlərin və hava limanı əməkdaşlarının təhlükəsizliyinin təmin olunması üçün tədbirlər görülür.
