Rusiya ordusu ötən sutka ərzində Ukraynanın Xarkov, Sumı və Zaporojye vilayətlərinə zərbələr endirib. Hücumlar nəticəsində 1 nəfər həlak olub, 27 nəfər xəsarət alıb.
Ukrayna mediasının məlumatına görə, bu barədə Vilayət Hərbi Administrasiyalarının rəhbərləri bildiriblər.
Xarkov Vilayət Hərbi Administrasiyasının rəhbəri Oleq Sinequbovun sözlərinə görə, Rusiya qoşunları vilayətin 24 yaşayış məntəqəsinə raketlər, idarəolunan aviabombalar və müxtəlif tipli pilotsuz uçuş aparatları ilə zərbələr endirib. Nəticədə 9 mülki şəxs xəsarət alıb.
Sumı Vilayət Hərbi Administrasiyasının rəhbəri Oleq Qriqorov bildirib ki, gecə saatlarında vilayətə idarəolunan aviabombalarla endirilən zərbələr nəticəsində 14 nəfər, o cümlədən 14 yaşlı yeniyetmə yaralanıb. Onun sözlərinə görə, xəsarət alanlara tibbi yardım göstərilib, hazırda zərbələrin fəsadları aradan qaldırılır.
Zaporojye Vilayət Hərbi Administrasiyasının rəhbəri İvan Fyodorov isə bildirib ki, Rusiya qoşunları sutka ərzində regionun 47 yaşayış məntəqəsinə 867 zərbə endirib. Nəticədə 1 nəfər ölüb, 4 nəfər yaralanıb.
