Azərbaycan-Qırğızıstan münasibətləri həm ikitərəfli əlaqələr, həm də Türk Dövlətləri Təşkilatı çərçivəsində strateji əhəmiyyət daşıyır.
Milli Məclisin deputatı, siyasi elmlər üzrə ekspert Hikmət Babaoğlu “Xəbər Mərkəzi”nə müsahibəsində Azərbaycan-Qırğızıstan münasibətlərinin inkişaf perspektivlərindən, iki ölkə arasında həyata keçirilən iqtisadi və investisiya layihələrindən, eləcə də Qırğızıstanın Orta Dəhliz üçün strateji əhəmiyyətindən danışıb.
Hikmət Babaoğlu bildirib ki, hazırda Azərbaycan və Qırğızıstan arasında əməkdaşlıq üçün xüsusi investisiya proqramı həyata keçirilir və bu proqram konkret layihələrlə dəstəklənir.
Onun sözlərinə görə, Prezident İlham Əliyevin Qırğızıstana son səfəri zamanı Azərbaycan dövlətinin vəsaiti hesabına inşa edilən otelin açılışının keçirilməsi də iki ölkə arasındakı münasibətlərin praktiki nəticələrindən biridir.
Deputat Qırğızıstanın coğrafi mövqeyinin də xüsusi strateji əhəmiyyət daşıdığını vurğulayıb. O qeyd edib ki, ölkənin Çinlə həmsərhəd olması onu Orta Dəhliz baxımından mühüm halqaya çevirir.
“Çindən gələn və Orta Dəhlizə yönləndiriləcək yüklərin bir hissəsi Çinlə həmsərhəd olan Qırğızıstan üzərindən Özbəkistana, oradan Türkmənistana, Türkmənistandan isə Transxəzər marşrutu ilə Azərbaycana gələcək və Azərbaycandan Avropaya gedəcək”.
Hikmət Babaoğlu hesab edir ki, bu marşrut Orta Dəhlizin xüsusi seqmentlərindən birinə çevrilə bilər.
“Qazaxıstan vasitəsilə də bənzər nəqliyyat kommunikasiyası mövcuddur. Lakin bu xətt Xəzər dənizinin şimal hissəsi, Aktau-Ələt limanları istiqamətində inkişaf edəcək. Orta Asiyanın əhali baxımından ən böyük, iqtisadi baxımdan isə ən sürətlə inkişaf edən ölkələrindən biri olan Özbəkistanın Qırğızıstan və Türkmənistan vasitəsilə Azərbaycana bağlanması isə başqa bir marşrut yaradır. Bu xətt Türkmənbaşı şəhərindən yenidən Ələt limanına yönələcək”, – deyə o bildirib.
Deputat əlavə edib ki, Azərbaycan Prezidentinin Qırğızıstana səfəri zamanı Özbəkistan üçün ayrıca limanın tikintisinin prioritet layihələr sırasına daxil edilməsi məsələsini gündəmə gətirməsi də bu baxımdan əhəmiyyətlidir.
“Bunun mənbəyi həm də Qırğızıstandır”, – deyə Hikmət Babaoğlu vurğulayıb.
O bildirib ki, Azərbaycan-Qırğızıstan münasibətləri yalnız iqtisadi və kommunikasiya layihələri ilə məhdudlaşmır.
“Biz qardaş Qırğız xalqı ilə ortaq mədəniyyətdən, ortaq tarixdən, ortaq siyasi keçmişdən gəlirik. Təsadüfi deyil ki, xüsusən Qarabağda Qırxqız yaylası var. Qırxqız yaylası qırğız toponiminin Azərbaycan dilində ifadəsidir”.
Hikmət Babaoğlu Azərbaycan və qırğız xalqları arasında dil baxımından da ciddi yaxınlıqların olduğunu qeyd edib.
“Biz tariximizi öyrənərkən görürük ki, Göytürklərdən bu günə qədər müxtəlif dövrlərdə qırğızlarla mədəni və intellektual təmaslarımız olub. Bu ənənəni əcdadlarımızdan bizə qalan miras kimi davam etdiririk”, – deyə deputat əlavə edib.
