Qara dənizdə iki ticarət gəmisi pilotsuz uçuş aparatlarının (PUA) hücumuna məruz qalıb. Gəmilərdən biri batıb.
Bolqarıstanın Baş naziri Rumen Radev bildirib ki, Malta bayrağı altında üzən “Chelsea 3” gəmisi ölkənin Byala şəhərindən 18 dəniz mili şərqdə üç PUA-nın hücumuna məruz qalıb.
Gəminin heyətində 7 Ukrayna və 8 Azərbaycan vətəndaşı olmaqla, ümumilikdə 15 nəfər olub. Onların hamısı xilas edilib, beş nəfər yüngül xəsarət alıb.
“Bolqarıstanın ərazi sularının birbaşa yaxınlığında ticarət gəmilərinə növbəti hücum qətiyyən yolverilməzdir”, – Rumen Radev deyib.
Baş nazirin sözlərinə görə, ikinci gəmi Krapets yaşayış məntəqəsindən 17 dəniz mili şərqdə hücuma məruz qalıb və batıb. Gəminin heyət üzvlərindən yalnız bir nəfəri xilas etmək mümkün olub.
Rumen Radev əlavə edib ki, Bolqarıstan PUA-ların hansı ölkəyə mənsub olduğunu müəyyənləşdirmək üçün beynəlxalq yardım almağa çalışacaq. O vurğulayıb ki, hazırda Sofiyanın hər hansı tərəfi ittiham etmək üçün sübutları yoxdur.
