Baş Prokurorluq “UĞUR-777” estetik mərkəzində qanunsuz tibbi fəaliyyətlə bağlı yayılan məlumatlara münasibət bildirib.
Məlumata görə, Gülbadə Abdullayeva barəsində Azərbaycan Respublikası Cinayət Məcəlləsinin 310-cu maddəsi (Vəzifəli şəxsin səlahiyyətlərini mənimsəmə) ilə aparılan cinayət təqibinə “Konstitusiya və Suverenlik İli” münasibətilə qəbul edilmiş amnistiya qərarının tətbiqi ilə xitam verilib.
Aparılan istintaq zamanı onun əməllərində Azərbaycan Respublikası Cinayət Məcəlləsinin 142.1-ci maddəsində (Qanuna və ya xüsusi qaydalara uyğun olaraq şəxsə kömək etməyə borclu olan tibb işçisinin üzrlü səbəblər olmadan tibbi yardım göstərməməsi, yaxud tibb işçisinin işə vicdansız və ya laqeyd münasibəti nəticəsində öz peşə vəzifəsini yerinə yetirməməsi və ya lazımi qaydada yerinə yetirməməsi ehtiyatsızlıqdan şəxsin sağlamlığına az ağır zərər vurulmasına səbəb olduqda) nəzərdə tutulan cinayət tərkibi müəyyən edilməyib.
Bununla yanaşı, onun zərərçəkmiş şəxsə vurduğu 2 min manat maddi ziyan və dövlət büdcəsinə ödənilməli olan 500 manat tam ödətdirilib. Gülbadə Abdullayeva barəsində həmçinin İnzibati Xətalar Məcəlləsinin 215.1 və 428.1-ci maddələri ilə inzibati icraat başlanılıb və cərimə tətbiq edilib.
Cinayət işi üzrə digər təqsirləndirilən şəxslərlə bağlı məhkəmə baxışı davam edir.
