Daxili İşlər Nazirliyinin (DİN) Kibercinayətkarlıqla Mübarizə Baş İdarəsi (KMBİ) qadınların fotolarından süni intellekt vasitəsilə saxta görüntülər hazırlayaraq şantaj edən şəxsləri saxlayıb.
DİN-in məlumatına görə, naməlum şəxslər qadınların sosial şəbəkələrdə paylaşdıqları fotoları süni intellekt proqramları ilə montaj edir, üzərinə nalayiq ifadələr əlavə edərək müxtəlif platformalarda yayır və həmin görüntülərin silinməsi müqabilində zərərçəkənlərdən pul tələb edirdilər.
Keçirilən əməliyyat-texniki tədbirlər nəticəsində bu əməlləri törətməkdə şübhəli bilinən 31 yaşlı Loğman Cəbizadə və 20 yaşlı Elvin Məmmədov saxlanılıblar.
Araşdırma zamanı məlum olub ki, onlar TikTok, Instagram və Telegram platformalarından qadınlara məxsus fotoları götürərək süni intellekt vasitəsilə dəyişdirib, saxta hesablarla yayıblar və sonradan zərərçəkənlərdən müxtəlif məbləğlərdə pul tələb ediblər.
Faktla bağlı cinayət işi başlanılıb, hər iki şəxs cinayət məsuliyyətinə cəlb edilib.
DİN vətəndaşlara müraciət edərək sosial şəbəkələrdə şəxsi foto və videoları paylaşarkən diqqətli olmağı, tanımadıqları şəxslərə belə materiallar göndərməməyi və şübhəli mesajlara inanmamağı tövsiyə edib.
