Azərbaycan Prezidenti İlham Əliyev sentyabrın 16-da Bakının Qaradağ rayonunda 100 MVt gücündə “Qobustan” Günəş Elektrik Stansiyasının açılışında iştirak edib.
Dövlət başçısını energetika naziri Pərviz Şahbazov, Çinin Azərbaycandakı səfiri Lu Mey və “Universal International Holdings Limited” şirkətinin baş icraçı direktoru Yi Nan qarşılayıblar.
Prezident İlham Əliyevə “Qobustan” Günəş Elektrik Stansiyası, “Universal Energy” şirkəti və onun Azərbaycandakı fəaliyyəti barədə məlumat verilib.
Bildirilib ki, Şanxayda yaradılmış “Universal Energy” şirkəti yaşıl enerji və enerji saxlanc sistemləri üzrə həllər təqdim edir. Şirkət Çinlə yanaşı, Qazaxıstan və Özbəkistanda da bərpaolunan enerji layihələri həyata keçirir.
Nazirlər Kabinetinin 2023-cü ildə qəbul etdiyi qərarla Bakı şəhərinin Qaradağ rayonunun Pirsaat qəsəbəsində 300,77 hektar torpaq sahəsi Günəş elektrik stansiyasının tikintisi məqsədilə bərpaolunan enerji mənbələri ərazisi kimi müəyyənləşdirilib.
Ərazi Günəş elektrik stansiyasının tikintisi məqsədilə hərraca çıxarılıb və Çinin “Universal International Holdings Limited” şirkəti 2024-cü ildə hərracın qalibi olub.
“Qobustan” Günəş Elektrik Stansiyası Azərbaycanda hərrac yolu ilə həyata keçirilən ilk, “Universal Energy” şirkətinin isə ölkəmizdə icra etdiyi ilk layihədir.
Stansiyada Günəş panelləri ilə yanaşı, sahə invertorları və transformatorlar quraşdırılıb, kabelləşdirmə işləri tam başa çatdırılıb.
Stansiyanın istismara verilməsindən sonra hər il təxminən 200 milyon kilovat-saat elektrik enerjisi istehsal ediləcəyi proqnozlaşdırılır. Bu, ildə 45 milyon kubmetr təbii qaza qənaət etməyə və atmosferə atılan karbon emissiyalarını 97 min ton azaltmağa imkan verəcək.
Azərbaycanda yaşıl enerji mənbələrinin texniki potensialı quruda 135 QVt, dənizdə isə 157 QVt qiymətləndirilir. İqtisadi potensial 27 QVt təşkil edir. Bunun 3 QVt-ı külək, 23 QVt-ı Günəş enerjisinin payına düşür. Bioenerji potensialı 380 MVt, dağ çaylarının potensialı isə 520 MVt həcmində qiymətləndirilir.
“Qobustan” Günəş Elektrik Stansiyasının istismara verilməsi ilə Azərbaycanda bərpaolunan enerji mənbələrinin ümumi gücü 2170 MVt-a, stansiyaların sayı isə 85-ə çatacaq.
Onlardan 65-i su elektrik stansiyası (1443,5 MVt), 6-sı külək elektrik stansiyası (306,5 MVt), 9-u Günəş elektrik stansiyası (278,2 MVt), 3-ü hibrid elektrik stansiyası (7,3 MVt), 1-i isə bioelektrik stansiyasıdır (37 MVt).
Bərpaolunan enerji mənbələri ölkənin ümumi enerji gücünün təxminən 20,8 faizini təşkil edir.
2027-ci ilin sonunadək təxminən 1,5 QVt gücündə bərpaolunan enerji layihələrinin reallaşdırılması nəzərdə tutulur.
