Azərbaycan Prezidenti İlham Əliyev oktyabrın 5-də Malayziyanın Azərbaycana yeni təyin olunmuş fövqəladə və səlahiyyətli səfiri Aznifah İsnariah Binti Abdul Qanini qəbul edib.
Səfir etimadnaməsini dövlət başçısına təqdim edib. Daha sonra Prezident İlham Əliyev səfirlə söhbət edib.
Görüşdə Azərbaycan ilə Malayziya arasında dost və qardaş münasibətlərin olduğu vurğulanıb. İqtisadi əməkdaşlığın siyasi əlaqələrin səviyyəsinə çatdırılması, enerji, sərmayələr, turizm və digər sahələrdə tərəfdaşlığın genişləndirilməsi, həmçinin siyasi dialoqun davam etdirilməsi məsələləri müzakirə olunub.
Prezident İlham Əliyev müxtəlif səviyyəli nümayəndə heyətlərinin qarşılıqlı səfərlərinin əhəmiyyətini qeyd edib və səfirə diplomatik fəaliyyətində uğurlar arzulayıb.
Səfir Malayziyanın Kralı Sultan İbrahimin və Baş nazir Ənvər İbrahimin salamlarını, həmçinin Prezident İlham Əliyevə Malayziyaya səfər dəvətlərini çatdırıb. Dövlət başçısı salamlara görə minnətdarlığını bildirib və onun da salamlarını Malayziya Kralına və Baş nazirinə çatdırmağı xahiş edib.
İlham Əliyev dəvəti məmnunluqla qəbul etdiyini bildirib. Prezident öz növbəsində Malayziya Kralını və Baş naziri Azərbaycana səfərə dəvət edib.
Söhbət zamanı beynəlxalq təşkilatlar çərçivəsində qarşılıqlı dəstəyin əhəmiyyəti də vurğulanıb.
Görüşdə turizm sahəsində əməkdaşlıq, qarşılıqlı şəkildə viza tələbinin aradan qaldırılması və Azərbaycanla Malayziya arasında birbaşa hava əlaqəsinin yaradılması məsələləri müzakirə olunub.
Təhsil sahəsində əlaqələrə də toxunulub. Bildirilib ki, azərbaycanlı tələbələr Malayziyada, Malayziya vətəndaşı olan tələbələr isə Azərbaycan dövlətinin təqdim etdiyi təqaüd proqramları əsasında ölkəmizdə təhsil alırlar.
