Azərbaycan Prezidenti İlham Əliyev sentyabrın 3-də ATƏT Parlament Assambleyasının prezidenti Pere Joan Pons Sanpietronu qəbul edib.
Görüşdə ATƏT məkanında təhlükəsizlik məsələləri, Azərbaycan-Ermənistan sülh gündəliyi və parlamentlərarası əlaqələr müzakirə olunub.
Pere Joan Pons Sanpietro ATƏT məkanında mövcud münaqişələrdən birinin həll olunduğunu və regionda davamlı sülhün təmin edildiyini bildirib. O, bu münasibətlə Azərbaycanla Ermənistan arasında sülh gündəliyində əldə olunan nailiyyətlərə görə Prezident İlham Əliyevi təbrik edib.
Dövlət başçısı təbrikə görə təşəkkürünü bildirib. İlham Əliyev qeyd edib ki, 30 ilə yaxın müddətdə münaqişənin həllinə məsul olan ATƏT-in Minsk qrupu danışıqlar prosesində hər hansı nəticə əldə etməyib. Prezident, həmçinin BMT Təhlükəsizlik Şurasının Ermənistan qoşunlarının Azərbaycan ərazisindən dərhal və qeyd-şərtsiz çıxarılmasını tələb edən qətnamələrinin yerinə yetirilmədiyini vurğulayıb.
İlham Əliyev Azərbaycanın münaqişəyə hərbi-siyasi vasitələrlə son qoyduğunu, ərazi bütövlüyünü və suverenliyini təmin etdiyini bildirib.
Söhbət zamanı Azərbaycanın ATƏT Parlament Assambleyası ilə təmaslarından və siyasi dialoqdan məmnunluq ifadə olunub. ATƏT Parlament Assambleyasının gündəliyində bütün ATƏT məkanına balanslı münasibətin nümayiş etdirilməsinin vacibliyi vurğulanıb.
Görüşdə mədəniyyətlərarası dialoq məsələsinə də toxunulub. Azərbaycanın bu prosesdə rolu və töhfələri qeyd edilib.
ATƏT Parlament Assambleyasının prezidenti Bakıda keçirilən 4-cü Beynəlxalq Minatəmizləmə Konfransının əhəmiyyətini vurğulayıb. O, mina probleminin ATƏT Parlament Assambleyasının gündəliyində də müzakirə olunduğunu bildirib.
