Ermənistanın əvvəlki hökuməti və Azərbaycana zərər vuran prezidentləri indiyədək lazımi cəzalarını almayıblar.
Bunu Azərbaycan Prezidenti İlham Əliyev Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 7-ci Zirvə Toplantısında bəyan edib.
Dövlət başçısı bildirib ki, Azərbaycanın əraziləri işğal altında olduğu dövrdə heç bir beynəlxalq qurum ölkəmizə dəstək göstərməyib, Ermənistana isə yardım edilib.
Prezidentin sözlərinə görə, 30 il ərzində Azərbaycanın beynəlxalq səviyyədə tanınmış ərazisinin təqribən 20 faizi Ermənistan tərəfindən işğal olunub. Ermənistan 1 milyon azərbaycanlını Qarabağ və Şərqi Zəngəzurdakı, eləcə də indiki Ermənistan ərazisindəki tarixi torpaqlarından qovaraq etnik təmizləmə həyata keçirib və Azərbaycana qarşı hərbi təcavüz edib.
İlham Əliyev xatırladıb ki, 1993-cü ildə BMT Təhlükəsizlik Şurası erməni qüvvələrinin işğal olunmuş ərazilərdən dərhal, tam və qeyd-şərtsiz çıxarılmasını tələb edən dörd qətnamə qəbul edib. Lakin həmin qətnamələr 30 il ərzində kağız üzərində qalıb.
Prezident, həmçinin münaqişənin həlli üçün 1992-ci ildə yaradılmış ATƏT-in Minsk qrupunun fəaliyyətinin imitasiya xarakteri daşıdığını bildirib.
“Ermənistanın keçmiş rəhbərliyi, ölkənin hər üç sabiq prezidenti və onların tərəfdarları – bu müharibə cinayətkarları və uşaq qatilləri indiyədək layiqli cəzalarını almayıblar”, – dövlət başçısı bildirib.
