Ermənistanın Baş naziri Nikol Paşinyan bildirib ki, ölkəsinin Avrasiya İqtisadi İttifaqında (Aİİ) iştirakı birtərəfli üstünlüklər əldə etməyə deyil, qarşılıqlı öhdəliklərin yerinə yetirilməsinə əsaslanır.
Paşinyanın sözlərinə görə, Ermənistan 2025-ci ildə Aİİ-nin ümumi idxal gömrük rüsumları büdcəsinə təxminən 319 milyon dollar köçürüb. Ölkənin xeyrinə bölüşdürülən vəsait isə təxminən 175 milyon dollar olub.
Baş nazir qeyd edib ki, bu göstəricilər Ermənistanın ittifaqın ümumi büdcəsinə aldığından xeyli çox vəsait ödədiyini və öhdəliklərini vicdanla yerinə yetirdiyini göstərir.
O əlavə edib ki, 2025-ci ildə Aİİ ölkələrindən Ermənistana idxal təxminən 5 milyard dollar, Ermənistanın həmin ölkələrə ixracı isə 3,2 milyard dollar təşkil edib. Onun fikrincə, bu rəqəmlər Ermənistanın ittifaq daxilində mühüm istehlak bazarlarından biri olduğunu göstərir.
