Ermənistanın Baş naziri Nikol Paşinyan sabiq deputatdan böhtan və təhqirlərə görə kompensasiya tələb edir.
Ermənistan mediasının yaydığı məlumata əsasən, Nikol Paşinyan sabiq deputat Sofiya Ovsepyanı və “Maarifçi Ermənistan” partiyasının rəhbəri Edmon Marukyanı məhkəməyə verib.
Paşinyan müxalif siyasətçi Artur Ovsepyandan onu təhqir edən ifadələrə görə üzr istəməsini və parlament seçkilərinin saxtalaşdırılması ilə bağlı səsləndirdiyi ittihamları təkzib etməsini tələb edir.
İddiaya əsasən, Paşinyan təhqirə görə 2 milyon dram (təxminən 5,4 min ABŞ dolları), böhtana görə isə 4 milyon dram (təxminən 10,8 min ABŞ dolları) məbləğində təzminat ödənilməsini istəyir.
Baş nazirin digər müxalif siyasətçi Edmon Marukyana qarşı qaldırdığı iddia isə natamam şəkildə dərc olunub. Sənəddə Marukyana qarşı irəli sürülən konkret tələblər göstərilməyib.
İddianın əsasını Marukyanın “Telegram” kanalında paylaşdığı məlumatlar, eləcə də parlament seçkilərindən qısa müddət sonra yayımladığı video təşkil edir.
