Daxili İşlər Nazirliyi (DİN) onlayn alış-veriş zamanı vətəndaşların kiberdələduzluqla üzləşməsi hallarının davam etdiyini bildirərək xəbərdarlıq edib.
Araşdırmalar və daxil olan müraciətlər göstərir ki, kiberdələduzlar saxta satış səhifələri yaradaraq müxtəlif məhsulları cəlbedici qiymətlərlə təklif edirlər. Ödəniş aldıqdan sonra isə vətəndaşla əlaqəni kəsir, telefon nömrələrini və sosial şəbəkə hesablarını bloklayırlar.
DİN vətəndaşlara internet və sosial şəbəkələrdə rastlaşdıqları satış səhifələrinin etibarlılığını əvvəlcədən yoxlamağı, tanımadıqları şəxslərdən məhsul sifariş etməməyi və xüsusilə əvvəlcədən ödəniş tələb olunan təkliflərə qarşı diqqətli olmağı tövsiyə edir.
Məhsul sifariş etməzdən və ödəniş həyata keçirməzdən əvvəl satıcı barədə məlumatların, əlaqə vasitələrinin və təqdim olunan səhifənin həqiqiliyinin yoxlanılması vacibdir.
Nazirlik etibar edilməyən və ya həqiqiliyinə əmin olunmayan səhifə və saytlara ödəniş etməməyi, bank kartı məlumatlarını, CVV/CVC kodunu, SMS vasitəsilə göndərilən təsdiq kodlarını və digər məxfi məlumatları üçüncü şəxslərlə paylaşmamağı tövsiyə edib.
Kiberdələduzluqla qarşılaşan vətəndaşlar DİN-in “102” Xidməti-Zəng Mərkəzinə və ya Nazirliyin rəsmi sosial şəbəkə hesablarına müraciət edə bilərlər.
