Kimya üzrə Nobel mükafatı laureatı, dünyaşöhrətli türk alimi Əziz Səncər Azərbaycan Prezidenti İlham Əliyevə təşəkkür məktubu ünvanlayıb.
Əziz Səncər məktubunda “Şöhrət” ordeni ilə təltif olunmasını həyatının ən böyük qürurverici və sevindirici hadisələrindən biri kimi qiymətləndirib və göstərilən yüksək etimada görə dövlət başçısına minnətdarlığını bildirib.
Alim Azərbaycana sevgisinin hər zaman səmimi hisslərə əsaslandığını və bunun qarşılığında heç nə gözləmədiyini qeyd edib. Azərbaycanın onun qəlbində Türkiyə qədər doğma Vətən kimi xüsusi yer tutduğunu vurğulayıb.
Əziz Səncər “Şöhrət” ordenini yalnız elmi fəaliyyətinə verilən yüksək qiymətin ifadəsi deyil, həm də “Bir millət, iki dövlət” məfkurəsinə əsaslanan qardaşlığın rəmzi kimi böyük qürurla daşıyacağını bildirib.
Xatırladaq ki, Prezident İlham Əliyevin 7 sentyabr 2026-cı il tarixli Sərəncamı ilə Əziz Səncər Azərbaycan beynəlxalq elmi və humanitar əməkdaşlığının möhkəmləndirilməsində xüsusi xidmətlərinə görə “Şöhrət” ordeni ilə təltif olunub.
