“Neftçi” və “Qarabağ” futbol klublarının beynəlxalq oyunları ilə əlaqədar “Bakı Metropoliteni” QSC gücləndirilmiş iş rejimində fəaliyyət göstərəcək.
Məlumata görə, hər iki qarşılaşmaya azarkeş marağı nəzərə alınaraq, metro ardıcıl iki gün xüsusi əməliyyat planı əsasında işləyəcək.
Bu gün keçiriləcək “Neftçi” – “Dinamo” (Belarus) oyunu ilə əlaqədar 8-ci km stadionunun yaxınlığında yerləşən “Xalqlar dostluğu” stansiyasında əlavə işçi qüvvəsi cəlb olunacaq və nəzarət tədbirləri gücləndiriləcək.
Sabah baş tutacaq “Qarabağ” – ÇSKA (Bolqarıstan) matçı ilə əlaqədar isə “Gənclik”, həmçinin “28 May” və “Nərimanov” stansiyalarında əlavə tədbirlər görüləcək.
Bildirilib ki, ehtiyat qatarlar xəttə buraxılmağa hazır vəziyyətdə saxlanılacaq. Oyunlardan sonra sərnişin axınından asılı olaraq digər stansiyalarda da qatarların hərəkət qrafiki tənzimlənəcək.
Qeyd olunub ki, ümumilikdə hər iki gün qatarların hərəkəti yay qrafikinə uyğun təşkil ediləcək.
