Laçın istiqamətində xidmət zamanı itkin düşən müddətli həqiqi hərbi xidmət hərbi qulluqçusu Nəsimi Musayevin Ermənistanda saxlanıldığı müəyyənləşdirilib.
Baş Prokurorluğun məlumatına görə, Nəsimi Musayevin sentyabrın 26-da xidmət yerində olmadığı müəyyən edilib və onun axtarışına başlanılıb.
Hərbi Prokurorluqda aparılan araşdırma zamanı hərbçinin hərbi hissəni özbaşına tərk etməsinə əsaslı şübhələr müəyyən edilib və faktla bağlı cinayət işi başlanılıb.
Həyata keçirilən tədbirlər nəticəsində Nəsimi Musayevin Ermənistan ərazisində olduğu və həmin ölkənin aidiyyəti orqanları tərəfindən saxlanıldığı müəyyənləşdirilib.
Azərbaycan tərəfi hərbçinin Ermənistanda olması, saxlanılması və hadisənin digər hallarının araşdırılması ilə bağlı qarşı tərəfin aidiyyəti qurumları ilə zəruri təmasları davam etdirir.
Faktla bağlı istintaq və digər prosessual tədbirlər davam etdirilir.
