Ali Məhkəmə qızına uzun müddət zorakılıq edən kürəkənini öldürən şəxsin cəzasını 9 il 6 aydan 1 il 6 aya endirib. Məhkum cəzasını çəkmiş hesab edilərək məhkəmə zalından azad olunub.
İş materiallarına görə, qadın həyat yoldaşı tərəfindən dəfələrlə fiziki və mənəvi zorakılığa məruz qalıb. 2024-cü il yanvarın 18-də yenidən döyülən qadın azyaşlı uşağı ilə evdən qaçaraq atasından kömək istəyib. Ata qızını və nəvəsini evinə aparıb, səhhəti pisləşən qızını isə xəstəxanaya yerləşdirib.
Oxşar xəbərlər
Həmin gün qayınatasının evinə gələn kürəkən aqressiv davranıb. Qayınatası ilə mübahisə zamanı ona şillə vurub, gödəkçəsində gizlətdiyi mətbəx bıçağı ilə hücum edərək baş nahiyəsindən yaralayıb. Qayınata bıçağı onun əlindən alsa da, kürəkən təpik və yumruq zərbələri ilə hücumu davam etdirib. Qarşıdurma zamanı qayınata bıçaqla kürəkəninə dörd xəsarət yetirib. Xəsarətlərdən üçü həyat üçün təhlükəli olub və kürəkən kəskin qanitirmədən ölüb.
Sumqayıt Ağır Cinayətlər Məhkəməsi qayınatanı qəsdən adam öldürməyə görə 9 il 6 ay müddətinə azadlıqdan məhrum edib. Apellyasiya məhkəməsi hökmü dəyişdirməyib.
Ali Məhkəmə isə qayınatanın real və davam edən hücumdan müdafiə olunduğunu, lakin müdafiə həddini aşdığını müəyyən edib. Buna görə də əməl Cinayət Məcəlləsinin 120.1-ci maddəsindən 123.1-ci maddəsinə — zəruri müdafiə həddini aşmaqla qəsdən adam öldürməyə tövsif edilib.
Məhkəmə məhkumun könüllü olaraq hüquq-mühafizə orqanlarına gəlməsini, təqsirini etiraf etməsini və digər yüngülləşdirici halları nəzərə alaraq ona 1 il 6 ay həbs cəzası təyin edib. Cəza müddəti 18 yanvar 2024-cü ildən hesablandığı üçün şəxs cəzasını çəkmiş hesab olunaraq məhkəmə zalından dərhal azad edilib.
