Yay mövsümündə çimərliklərə üz tutan sərnişinlərin sayının artması nəzərə alınaraq, iyulun 18-dən “Koroğlu” Nəqliyyat Mübadilə Mərkəzini “Sea Breeze” istirahət mərkəzi ilə birləşdirən 150E nömrəli ekspres marşrutun fəaliyyəti bərpa edilir.
Azərbaycan Yerüstü Nəqliyyat Agentliyinin (AYNA) məlumatına görə, marşrut yalnız şənbə və bazar günləri fəaliyyət göstərəcək. Avtobuslar metronun “Koroğlu” stansiyasının cənub çıxışından (“Piramida” tərəf) hərəkət edəcək və yolboyu bir neçə aralıq dayanacaqda sərnişin götürəcək.
Marşrut Heydər Əliyev prospekti, Bakı Ekspo Mərkəzi, Binə, Qala yolu, Buzovna, Bilgəh Kardioloji Sanatoriyası, Bilgəh–Pirşağı yolu, “Sea Breeze 1” və “Sea Breeze 2” dayanacaqlarını əhatə edəcək.
Böyüktutumlu avtobuslar saat 07:00-dan 22:00-dək hər 30 dəqiqədən bir hərəkət edəcək. Gedişhaqqı 0,90 manatdır və ödəniş yalnız nağdsız qaydada qəbul olunur.
