Rəsmi Tehran Xəzər dənizində İranın mülki gəmisinə edilən hücumla bağlı Ukraynadan təzminat tələb edib.
Bunu İranın xarici işlər naziri Abbas Əraqçi ukraynalı həmkarı Andrey Sibiqa ilə telefon danışığından sonra “X” sosial şəbəkəsində yazıb.
Əraqçinin sözlərinə görə, Sibiqa ona İran gəmisinə hücumun qəsdən həyata keçirilmədiyini bildirib.
“İran da eskalasiya istəmir, lakin vətəndaşlarımıza və ya maraqlarımıza qarşı hər hansı hücumun qəbuledilməz olduğunu açıq şəkildə bildirdim. İtkilərə görə təzminat ödənilməlidir”, – deyə İran XİN rəhbəri vurğulayıb.
Xatırladaq ki, İran Xarici İşlər Nazirliyi iyulun 25-də Ukraynanın Xəzər dənizində İranın ticarət gəmisinə hücumu nəticəsində bir heyət üzvünün həlak olduğunu, iki nəfərin isə yaralandığını açıqlamışdı. Ukrayna Prezidenti Volodimir Zelenski isə Xəzərdə Rusiyaya hərbi yüklərin daşınması üçün istifadə olunduğunu iddia etdiyi İran gəmilərinin hədəfə alındığını bildirmişdi.
