Cənub marşrutlarında yaranan fasilələr və Hörmüz boğazı ətrafında artan qeyri-müəyyənlik fonunda İran xarici ticarətin ölkənin şimalı və Xəzər dənizi vasitəsilə inkişaf etdirilməsi imkanlarını nəzərdən keçirir.
İranın “Fars” agentliyində yayımlanan məqalədə qeyd olunub ki, bu şəraitdə bəzi ekspertlərin “Xəzər Ekspresi” adlandırdığı marşrut xüsusi əhəmiyyət daşıyır.
Bildirilir ki, bu yol İranı şimal limanları vasitəsilə Rusiyaya, daha sonra isə Avrasiya nəqliyyat şəbəkəsinə birləşdirə və ölkənin cənub ticarət marşrutlarından asılılığını qismən azalda bilər.
Məqalədə Xəzər dənizinin Rusiya və Qazaxıstandan taxıl, kənd təsərrüfatı məhsulları, ağac, xammal və digər zəruri malların idxalı, həmçinin İranın kənd təsərrüfatı, sənaye və tikinti məhsullarının ixracı üçün mühüm marşruta çevrilə biləcəyi vurğulanıb.
Yazıda qeyd olunub ki, hazırkı mərhələdə əsas prioritet müvafiq sənədin təsdiqini sürətləndirmək deyil, araşdırmaları və məsələnin hərtərəfli nəzərdən keçirilməsini başa çatdırmaq olmalıdır.
Məlumata görə, İran üçün Xəzər dənizinin əhəmiyyətinin yalnız su və dəniz dibi sahələri ilə bağlı olmadığı, əsas məsələnin ölkənin Xəzər vasitəsilə ticarət, tranzit və iqtisadi imkanlardan nə qədər faydalana biləcəyi olduğu bildirilib.
Qeyd edək ki, İran Prezidenti Məsud Pezeşkian Azərbaycanın ölkəsi ilə əlaqələri yeni səviyyəyə qaldırmaq üçün zəmin yaratdığını bildirib. Pezeşkianın əməkdaşlıq imkanlarını nəzərdən keçirdiyi Xəzəryanı ölkələr sırasında Türkmənistan da yer alır.
